दुष्काळमुक्तीसाठी गायत्री परिवाराने केला संकल्प यज्ञ

जालना/प्रतिनिधी/ जालना शहर व जिल्ह्यावरील संभाव्य दुष्काळाचे संकट दूर व्हावे, नागरिक व प्रशासनाला या परिस्थितीशी लढण्याचे सामर्थ्य मिळावे, पुढील पावसाळ्यापर्यंत पाणीसाठा पुरावा आणि समाधानकारक पाऊस पडावा, या प्रार्थनेसह गायत्री परिवार, जालनाच्यावतीने शनिवार दि. 24 ऑक्टोबर रोजी सकाळी कालीकुर्ती येथील हनुमान मंदिरात विशेष संकल्प यज्ञ पार पडला.

      या यज्ञात जालन्याच्या महापौर वंदनाताई मगरे यांनी स्वतः सहभागी होऊन आहुती अर्पण केली. त्या म्हणाल्या की, परमेश्वराने दुष्काळाशी लढण्याची शक्ती द्यावी, मात्र निसर्ग व जलसंपत्तीचे रक्षण करणे ही आपलीच जबाबदारी आहे. पाण्याचा प्रत्येक थेंब जपला पाहिजे. स्वयंसेवी संस्थांनी जलसंवर्धनासाठी जनजागृती करावी आणि गरजूंना मदत करावी. चांगला पाऊस पडण्याची आशा व्यक्त करत त्यांनी उपस्थितांकडून पाणीबचत, वृक्षारोपण व पर्यावरण संरक्षणाची सामूहिक शपथ वदवून घेत गायत्री परिवार व ॲड. महेश धन्नावत यांच्या उपक्रमाचे त्यांनी विशेष कौतुक केले.

      ॲड. महेश धन्नावत म्हणाले की, दुष्काळ हे केवळ प्रशासनाचे नव्हे, तर संपूर्ण समाजाचे संकट आहे. प्रार्थनेबरोबर प्रत्यक्ष कृतीही आवश्यक आहे. प्रशासनाने पाण्याचे योग्य नियोजन करावे आणि नागरिकांनी पाण्याचा अपव्यय टाळून वृक्षसंवर्धन करावे. आज पाणी वाचवले तरच उद्याची पिढी सुरक्षित राहील.

    या संकल्प यज्ञास गायत्री परिवाराचे रामदेव श्रोत्रिय, गिरधारीलाल वर्मा, श्री. श्रीमाली, ॲड. महेश धन्नावत, श्लोक अग्रवाल, भूषण यादव, अमोल बांगड, श्याम सारस्वत, बॉबी अग्रवाल, अमोल सोनवणे, संतोष खंडेलवाल, हरिनारायण जयस्वाल, शेखर तवरावाला, अतुल राठी, हितेश जोशी, श्री. गोयल यांच्यासह सामाजिक कार्यकर्ते व नागरिक उपस्थित होते.

     पाणी वाचवा, झाडे लावा, निसर्ग जगवा या संदेशासह यज्ञाची सांगता झाली. सकाळी दुष्काळ निवारणासाठी प्रार्थना आणि दुपारी काही भागात पावसाच्या हलक्या सरी, हा योगायोग उपस्थितांसाठी विशेष आनंददायी ठरला.