आरपीएफ नांदेड विभागाकडून प्रवासी सुरक्षेसाठी कडक उपाययोजना “ऑपरेशन नन्हे फरिश्ते” आणि “ऑपरेशन यात्री सुरक्षा” अंतर्गत मोठे यश

आरपीएफ नांदेड विभागाकडून प्रवासी सुरक्षेसाठी कडक उपाययोजना

“ऑपरेशन नन्हे फरिश्ते” आणि “ऑपरेशन यात्री सुरक्षा” अंतर्गत मोठे यश

 दक्षिण मध्य रेल्वेच्या नांदेड विभागामार्फत रेल्वे संरक्षण दल (RPF) आणि गुन्हे गुप्तवार्ता शाखा (CIB) यांनी लोहमार्ग पोलीस (जीआरपी) च्या समन्वयाने प्रवासी सुरक्षा, संरक्षण आणि बालक संरक्षणासाठी सातत्यपूर्ण मोहिमा राबवून आपली कटिबद्धता पुन्हा अधोरेखित केली आहे.

 ऑपरेशन नन्हे फरिश्ते – जालना येथे अल्पवयीन मुलाची सुरक्षित सुटका

 दि. 28.02.2026 रोजी गाडी क्र. 12716 एक्सप्रेस जालना रेल्वे स्थानकावर आल्यानंतर आरपीएफच्या सतर्क कर्मचाऱ्यांनी सामान्य डब्यात एक अल्पवयीन मुलगा संशयास्पद परिस्थितीत एकटाच प्रवास करताना आढळला. चौकशीदरम्यान कोणत्याही सहप्रवाशाला त्याच्याबाबत माहिती देता आली नाही.

त्या मुलास तात्काळ सुरक्षित ताब्यात घेऊन आरपीएफ पोस्ट जालना येथे आणण्यात आले. चौकशीदरम्यान त्याने आपल्या मोठ्या भावाला न सांगता घर सोडल्याचे सांगितले. त्याचा मोठा भाऊ छत्रपती संभाजीनगर येथे कार्यरत आहे. आरपीएफने तात्काळ कुटुंबाशी संपर्क साधून बालकल्याण समिती (CWC), जालना यांच्याशी समन्वय साधला. आवश्यक पडताळणीनंतर संबंधित बालकास पुढील कायदेशीर संरक्षणासाठी बालकल्याण समितीकडे सुपूर्द करण्यात आले.

ही वेळेवर करण्यात आलेली कारवाई “ऑपरेशन नन्हे फरिश्ते” अंतर्गत आरपीएफच्या मानवीय बांधिलकीचे द्योतक आहे. या उपक्रमाचा उद्देश रेल्वे परिसरातील असुरक्षित व अल्पवयीन मुलांचे रक्षण व पुनर्वसन करणे हा आहे.

 ऑपरेशन यात्री सुरक्षा – गुन्हेगारीविरोधात ठोस कारवाई

 “ऑपरेशन यात्री सुरक्षा” अंतर्गत विभागात खालीलप्रमाणे यशस्वी कारवाया करण्यात आल्या:

 1) परभणी येथे चोरीचा प्रयत्न उधळला

 गुन्हे गुप्तवार्ता शाखा (CIB) /नांदेड आणि RPF/परभणी यांच्या संयुक्त पथकाने परभणी रेल्वे स्थानकावर एका प्रवाशाचे सामान चोरी करण्याचा प्रयत्न करणाऱ्या आरोपीस रंगेहात पकडले. संबंधित आरोपीस जीआरपी/परभणी यांच्या ताब्यात देण्यात आले असून त्याच्याविरुद्ध संबंधित कायद्यान्वये गुन्हा दाखल करण्यात आला आहे.

 2) नांदेड येथे फरार दरोडा आरोपी अटक

 दि. 27.02.2026 रोजी सुमारे 21:00 वाजता गुन्हे गुप्तवार्ता शाखा /नांदेड आणि लोहमार्ग पोलीस/नांदेड यांच्या संयुक्त पथकाने GRP/नांदेड गुन्हा क्र. 40/2026, कलम 309(3) BNS अंतर्गत फरार असलेल्या आरोपीस अटक केली.

सदर आरोपीने नांदेड यार्ड परिसरात एका प्रवाशास लुटून खालील मुद्देमाल चोरला होता:

•           सोन्याची साखळी     – किंमत ₹80,000/-

•           ओप्पो मोबाईल फोन – किंमत ₹24,999/-

•           रोख रक्कम ₹4,000/-

एकूण किंमत: ₹1,08,999/-

चौकशीदरम्यान आरोपीने सोन्याची साखळी विकून पैसे खर्च केल्याची कबुली दिली. आरोपीस पुढील तपासासाठी लोहमार्ग पोलीस  /नांदेड यांच्या ताब्यात देण्यात आले. दि. 28.02.2026 रोजी त्यास मा. प्रथम श्रेणी न्याय दंडाधिकारी (JMFC), नांदेड यांच्या न्यायालयात हजर करण्यात आले असता चोरीचा मुद्देमाल जप्त करण्यासाठी पोलिस कोठडी (PCR) मंजूर करण्यात आली आहे. पुढील तपास सुरू आहे.

3) सीपीएसएन येथे सवयीचा पाकीटमार जेरबंद

छत्रपती संभाजीनगर रेल्वे स्थानक (CPSN) येथे CIB/नांदेड, छत्रपती संभाजीनगर पोस्ट व लोहमार्ग पोलीस  यांच्या संयुक्त पथकाने प्लॅटफॉर्म क्र. 01 वर गुप्त पाहणीदरम्यान सवयीच्या पाकीटमारास अटक केली. त्याच्याकडून ₹10,300/- रोख रक्कम असलेले चोरीचे पाकीट जप्त करण्यात आले असून ते संबंधित प्रवाशास परत करण्यात आले. आरोपीस पुढील कायदेशीर कारवाईसाठी लोहमार्ग पोलीस  / छत्रपती संभाजीनगर यांच्या ताब्यात देण्यात आले असून BNS-2023 अंतर्गत गुन्हा नोंदविण्यात आला आहे.

या समन्वित व तातडीच्या कारवाया रेल्वे प्रशासनाची प्रवाशांविरुद्ध होणाऱ्या गुन्ह्यांबाबत शून्य सहनशीलता धोरण स्पष्ट करतात तसेच नांदेड विभागातील आरपीएफची सुरक्षित व संरक्षित रेल्वे प्रवासासाठी असलेली कटिबद्धता अधोरेखित करतात.

प्रवाशांनी सतर्क राहून कोणतीही संशयास्पद हालचाल दिसल्यास आरपीएफ हेल्पलाईन क्रमांक 139 वर संपर्क साधावा किंवा जवळच्या आरपीएफ कर्मचाऱ्यांशी संपर्क करावा.