श्री देवेंद्र फडणवीस, माननीय मुख्यमंत्री यांच्या हस्ते हजूर साहिब नांदेड – छत्रपती शिवाजी महाराज टर्मिनस वंदे भारत एक्सप्रेस ला हिरवी झेंडी दाखवून शुभारंभ
नांदेड–मुंबई ‘वंदे भारत एक्सप्रेस’ मराठवाड्याच्या रेल्वे प्रवासातील नवे पर्व – माननीय मुख्यमंत्री
दक्षिण मध्य रेल्वे व मध्य रेल्वेच्या संयुक्त प्रयत्नांतून मराठवाड्यातील पहिली वंदे भारत एक्सप्रेस आज हुजूर साहिब नांदेड स्थानकावरून धावू लागली. महाराष्ट्राच्या मराठवाडा विभागासाठी हा ऐतिहासिक टप्पा ठरला असून, या गाडीमुळे प्रवाशांना मुंबईशी जलद, सुरक्षित आणि आरामदायी दळणवळणाची सोय उपलब्ध होणार आहे.
नांदेड येथील रेल्वे स्थानकावर आयोजित कार्यक्रमप्रसंगी माननीय खासदार श्री अशोकराव चव्हाण, माननीय खासदार डॉ. अजित गोपछडे, माननीय आमदार श्री विक्रम काळे, दक्षिण मध्य रेल्वेचे अप्पर महाव्यवस्थापक श्री सत्यप्रकाश, विभागीय रेल्वे व्यवस्थापक श्री प्रदीप कामले, नांदेड परिक्षेत्राचे पोलिस उपमहानिरीक्षक श्री शहाजी उमाप, जिल्हाधिकारी श्री राहुल कर्डीले, पोलिस अधीक्षक श्री अबिनाश कुमार, गुरुद्वारा लंगर साहिबचे संत बाबा बलविंदरसिंघजी, पत्रकार, नागरिक आदीची उपस्थिती होती. यावेळी उपस्थित नागरिक व प्रवाशांमध्ये आनंद व उत्साहाचे वातावरण होते.
माननीय मुख्यमंत्री श्री. देवेंद्र फडणवीस यांनी या गाडीस मुंबई येथून व्हिडियो कॉन्फरन्सिंग द्वारे हिरवी झेंडी दाखवून रवाना केले. याप्रसंगी माननीय मुख्यमंत्री म्हणाले, पंतप्रधान नरेंद्र मोदी यांच्या नेतृत्वात भारतीय रेल्वे कात टाकत आहे. प्रगत देशांसारखे आरामदायक सुविधा असलेली भारतात निर्मित वंदे भारत रेल्वे ही त्याचेच प्रतीक आहे. मुंबई ते नांदेड हे 610 किलोमीटरचे अंतर 9 ते 9.30 तासात पूर्ण होणार आहे. पूर्वी जालनापर्यंत धावणारी वंदे भारत आता हुजूर साहिब नांदेड पर्यंत जात आहे. या रेल्वे गाडीची क्षमता 500 वरून 1440 पर्यंत वाढवण्यात आली आहे. तसेच गाडीचे डब्बे 8 वरून 20 पर्यंत वाढवण्यात आले आहे. नांदेड हे शिख धर्मियांचे महत्त्वाचे श्रद्धास्थान आहे. त्यामुळे येथे येणाऱ्या भाविकांना, प्रवाशांना वेगवान व आरामदायी प्रवासाची अनुभूती ‘वंदे भारत’ एक्सप्रेसच्या माध्यमातून शक्य होणार आहे. वंदे भारत एक्सप्रेसच्या सुखकर, सुरक्षित आणि आरामदायी प्रवासासाठी मराठवाड्यातील जनतेचे अभिनंदनही मुख्यमंत्री श्री. फडणवीस यांनी यावेळी केले.
माननीय खासदार श्री. अशोकराव चव्हाण म्हणाले की, “वंदे भारत एक्सप्रेस हा विकसित महाराष्ट्राकडे नेणारा महत्त्वाचा टप्पा आहे. प्रवासाचा वेळ आणखी कमी झाला तर ही गाडी मुंबई सात तासांत गाठू शकेल. नांदेड विमानतळ सुरू होणे आणि या गाडीची सुरूवात, या दोन्ही गोष्टींमुळे नांदेडच्या विकासाला आणि पर्यटनाला मोठी चालना मिळणार आहे.”
माननीय खासदार डॉ. अजित गोपछडे यांनी सांगितले की, “ही गाडी नांदेडकरांसाठी अमूल्य भेट आहे. पंतप्रधान नरेंद्र मोदी, केंद्रीय रेल्वे मंत्री आश्विन वैष्णव व मुख्यमंत्री देवेंद्र फडणवीस यांचे मनःपूर्वक आभार. प्रवाशांनी या आधुनिक सुविधायुक्त गाडीचा अवश्य लाभ घ्यावा.”
माननीय आमदार (MLC) श्री. विक्रम काळे म्हणाले की, “नांदेड–मुंबई वंदे भारत एक्सप्रेस सुरू झाल्याबद्दल सर्वांना शुभेच्छा. तसेच लवकरच नांदेड–बिदर व नांदेड–लातूर रेल्वेमार्ग पूर्ण होऊन नांदेड पुण्याला जोडले जाईल, अशी अपेक्षा आहे.”
