वीज ग्राहकांना दर्जेदार व तत्पर सेवा देणे हे महावितरणचे आद्य कर्तव्य
महावितरणचे संचालक (मानव संसाधन) श्री. राजेंद्र पवार यांचे प्रतिपादन
छत्रपती संभाजीनगर : वीज ग्राहकांना दर्जेदार व तत्पर सेवा देणे हे महावितरणचे कर्तव्य आहे. अत्यंत प्रतिकूल परिस्थितीत महावितरणचे अभियंते, अधिकारी व कर्मचाऱ्यांनी ग्राहकांना उत्कृष्ट सेवा देण्याचे नवे मापदंड निर्माण केले आहेत.
ग्राहक सेवेचा हा वारसा जोपासत वीजग्राहकांना सर्वोत्तम सेवा देण्यासाठी सर्वतोपरी प्रयत्न करा आणि जनमानसात महावितरणची प्रतिमा उंचवा, असे आवाहन महावितरणचे संचालक (मानव संसाधन) श्री. राजेंद्र पवार यांनी शुक्रवारी (1 ऑगस्ट) केले.
महाराष्ट्र राज्य वीज तांत्रिक कामगार संघटनेतर्फे भारतरत्न मौलाना अबुल कलाम आझाद संशोधन केंद्राच्या सभागृहात आयोजित सत्कार समारंभ व तांत्रिक कामगारांच्या कार्यशाळेत प्रमुख अतिथी म्हणून संचालक श्री. पवार बोलत होते. कार्यक्रमाच्या अध्यक्षस्थानी संघटनेचे अध्यक्ष श्री. भाऊसाहेब भाकरे होते तर सरचिटणीस श्री. सय्यद जहिरोद्दिन, महापारेषणचे प्रभारी मुख्य अभियंता श्री. रंगनाथ चव्हाण, अधीक्षक अभियंता श्री. मनीष ठाकरे, कार्यकारी अभियंता श्री. प्रसाद महातोले, उपमुख्य औद्योगिक संबंध अधिकारी श्री. विश्वास पाटील, संघटनेचे पदाधिकारी श्री. नानासाहेब चट्टे, श्री. मजहर पठाण, श्री. कैलास गौरकर, श्री. शेख मुजीब, श्री. बी.डी. पाटील, श्री. अजिज पठाण, श्री. आर.पी. थोरात, श्री. ताराचंद कोल्हे, श्री.साजेद मियाँ यांची प्रमुख उपस्थिती होती.
महाराष्ट्र राज्य वीज तांत्रिक कामगार संघटनेतर्फे सरचिटणीस श्री. सय्यद जहिरोद्दिन यांनी संचालक (मानव संसाधन) पदी निवड झाल्याबद्दल श्री. राजेंद्र पवार यांचा यथोचित सत्कार केला. यावेळी श्री. पवार म्हणाले, तत्कालिन महाराष्ट्र राज्य विद्युत मंडळ व महावितरणमध्ये मी एकूण 36 वर्षे सेवा केली. यात सर्वाधिक 16 वर्षे मी शाखा अभियंता होतो. त्यामुळे सर्व तांत्रिक कर्मचारी माझ्या सर्वात जवळचे होते, आहेत आणि राहतील. महावितरण ही तांत्रिक कर्मचाऱ्यांवर चालते. शाखा अभियंता व तांत्रिक कर्मचारी महावितरणची प्रतिमा ठरवतात. आपले कार्यालय व उपकेंद्र स्वच्छ व सुंदर ठेवून त्याना आयएसओ मानांकन मिळवण्याचा प्रयत्न करा.
संचालक श्री. पवार म्हणाले की, महावितरणच्या अभियंते, कर्मचाऱ्यांनी चांगले काम केले तर कुठल्याही स्पर्धेत आपण टिकू शकतो. त्यामुळे अखंडित व दर्जेदार वीजपुरवठा, तत्परतेने नवीन वीजजोडणी, ग्राहकांच्या तक्रारींचा वेळेवर निपटारा, वीजबिलांची शंभर टक्के वसुली यास आपले प्राधान्य असले पाहिजे.
महावितरणने जवळपास साडेपाच हजार विद्युत सहायकांच्या भरतीची निवड यादी नुकतीच जाहीर केली आहे. लवकरच हे कर्मचारी रुजू होऊन शाखा कार्यालये अधिक प्रभावीपणे काम करू शकतील. तांत्रिक कामगार, कर्मचाऱ्यांचे प्रश्न सोडवण्यासाठी प्रशासन कटिबद्ध आहे. स्थानिक प्रश्नांबाबत संबंधितांना योग्य ते निर्देश देण्यात येतील. बदल्यांमध्ये पारदर्शकता आणली असून, सर्वांचे समाधान करण्याचा प्रयत्न केला असल्याचे श्री. पवार यांनी सांगितले.
प्रास्ताविकात श्री. सय्यद जहिरोद्दिन यांनी श्री. राजेंद्र पवार यांच्या रूपाने शाखा अभियंता ते मुख्य अभियंता पदावर काम केलेला आपलाच अधिकारी मानव संसाधन संचालकपदी नियुक्त झाल्याबद्दल आनंद व्यक्त केला. श्री. पवार यांच्या सकारात्मक प्रतिसादामुळे अल्पावधीतच कर्मचाऱ्यांचे अनेक प्रलंबित प्रश्न सुटल्याचे श्री. जहिरोद्दिन म्हणाले. श्री. भाऊसाहेब भाकरे यांनी अध्यक्षीय समारोप केला. सूत्रसंचालन श्री. कैलास गौरकर यांनी केले. श्री. शेख रफिक यांनी आभार मानले.
